Ысык-Көл облусунун Чолпон-Ата шаарында 6-августта жергиликтүү ишкерден акча талап кылган деп шектелген төрт адам кармалды. Бул тууралуу Улуттук коопсуздук мамлекеттик комитети билдирди.
Ага ылайык, жергиликтүү ишкерден опузалап талап кылынган акча каражатын алып жаткан учурда, Чолпон-Ата шаарынын 1999-жылы туулган жашоочусу А.у.А. кылмыш үстүндө кармалган.
Дагы үч шектүү шериктеш: 2001-жылы туулган Д.у.К., 2001-жылы туулган М.Ш.М., 2000-жылы туулган А.Э.К. кармалды. Тергөөдө аныкталгандай, шектүүлөр ишкерди күч колдонуу менен коркутуп, андан ири өлчөмдөгү акча каражатын опузалап талап кылышкан.
Бул факты боюнча Кылмыш-жаза кодексинин 208-беренесинин 4-бөлүгү («Уюшкан топ тарабынан жасалган опузалоо») менен кылмыш иши козголду. Учурда тергөө жүрүүдө.
