Ысык-Көл облусунун Чолпон-Ата райондук электр тармактарынын (РЭТ) башчысы жашаган жеринде криптовалютаны өндүрүү үчүн майнинг ферма уюштурганы аныкталды. Бул тууралуу УКМКнын басма сөз кызматы билдирди.
Маалыматка ылайык, “И.А.Дж.” энергетика тармагында иштеп жатып, суунун аздыгынан улам республикада энергетикалык каатчылык болуп жатканына карабастан, кызматтык абалынан кыянаттык менен пайдаланып, электр энергиясын уурдап, муну менен Кыргыз Республикасынын энергетикалык коопсуздугуна зыян келтирген.
Бул факт Кылмыштардын жана жоруктардын бирдиктүү реестрине катталып, сотко чейин өндүруш иши башталган.
Учурда келтирилген зыяндын өлчөмүн аныктоону камтыган зарыл болгон ыкчам-тергөө иш-чаралары жүргүзүлүүдө.
Белгилей кетсек, “И.А.Дж.” узак убакыт бою Чолпон-Ата РЭТте ар кандай кызматтарда иштеп, 2021-жылдын 8-декабрынан тарта аталган уюмдун башчысы болуп дайындалган.
