Бишкекте №13, №28 жана №52 билим берүү мекемелери аралыктан окушууда. Бул тууралуу борбор калаанын мэриясынын басма сөз кызматы билдирди.
Анын айтымында, мектептердин онлайн режимге өтүүсү коронавирус илдетин жуктуруп алган окуучу же мугалим менен болгон байланыштан улам каралган.
«Акыркы чечимди Санитардык-эпидемиологиялык көзөмөлдөө борборунун эпидемиологдору кабыл алышат. Коронавирус илдети аныкталганда Билим берүү жана илим, Саламаттыкты сактоо жана социалдык өнүгүү министрликтеринин алгоритмдерине жана Борбордук мамлекеттик санитардык-эпидемиологиялык кызматынын буйругуна ылайык ыкчам иш жүргүзүлөт», — дейт ал.
Мындан тышкары, Борбордук мамлекеттик санитардык-эпидемиологиялык кызматынын көрсөтмөсүнө ылайык, жети мектептин 11 классы онлайн режиминде билим берүүгө өттү.
Мэрия кошумчалагандай, 9-апрелге карата 22 баладан COVID-19 тастыкталган, ал эми мугалимдер арасында — 16 учур катталган.