Ленин бир мандаттуу шайлоо округу боюнча Жогорку Кеңештин депутаттыгына талапкер Дамира Ниязалиеванын шайлоо штабынын кызматкерлери кармалып, убактылуу кармоочу жайга киргизилди. Бул тууралуу Бишкек ШИИБден билдиришти.
Бишкек шаардык ички иштер башкармалыгынын тергөө кызматы Кылмыш-жаза кодексинин 196-беренеси – “Шайлоочулардын добуштарын сатып алуу” боюнча козгогон кылмыш ишинин алкагында У.Р. жана А.А. аттуу жарандарды кармап, убактылуу кармоочу жайга киргизди. Учурда тергөө уланууда.
29-майда социалдык тармакка Ленин району боюнча өткөн шайлоодо эң көп добуш алган Дамира Ниязалиевага таандык делген аудио тарап, анда агитатор менен добуш сатып алуу талкууланган. 30-майга караган түнү милиция анын штабында тинтүү иштерин жүргүзүп, штабдын эшигин жаап, мөөр басып кеткен.