Жогорку Кеңештин депутаты Мирлан Самыйкожо социалдык баракчасына пост жүктөгөн. Андагы сүрөттөн Кыргызстандын туусунун өзгөрүүгө сунуштап жаткан версиясын Өзбекстандын Самарканд шаарында өтүп жаткан спорттук мелдеште илингенин көрүүгө болот.
Депутат буга төмөнкүдөй билдирүү калтырган: “Байрак кол жоолук эмес, ким каалагандай пайдалангыдай. Эгер бул маалымат чын болсо, чара көрүлүшү керек”.
Белгилесек, Жогорку Кеңештин төрагасы Нурланбек Шакиев менен депутат Улан Примов туудагы айрым элементтерге тактоо киргизүүгө байланышкан мыйзам долбоорун демилгелеп жатышканын билдирген.
Президент Садыр Жапаров тууну өзгөртүү идеясын колдой турганын айткан.
