«Улуттук энергохолдинг» ишканасы жалпы өлкө аймагындагы көчөдөгү көрнөк-жарнактардын, кафе-ресторан, дүкөн жана башка оюн-зоок, соода борборлорунун жарнактык жарыктарын өчүрүү тууралуу буйрук чыгарды. Бул тууралуу ишкананын басма сөз катчысы Азамат Курамаев билдирди.
Маалыматка ылайык, мындай чаралар электр энергиясын үнөмдөө максатында көрүлүп, атайын көзөмөлдөө боюнча тапшырмалар берилди. Анда парктардагы жарыктарды өчүрүү тууралуу айтылган эмес. Буйрукка мекеменин башчысынын орун басары Замирбек Кожомамбетов 27-сентябрда кол койгон.
«Өлкөдө электр энергиясын чектөө киргизилбегенин бекемдеп, жер-жерлерде электр энергиясы кышкы жылуулук сезонуна даярдык көрүүгө байланыштуу өчүрүлүп жатат»-дейт Азамат Курамаев.
Ошондой эле, электр энергиясын үнөмдөө максатында ашыкча жарыктандырууга жол бербөө тууралуу буйрук «Түндүкэлектро»,»Чыгышэлектро», «Ошэлектро» жана «Жалалабатэлектро» ишканаларына да жиберилди.