Президент Садыр Жапаров эртең, 27-октябрда, Казакстанга иш сапары менен барат.
Мамлекет башчысы Астана шаарында Борбор Азия жана Европа Биримдиги өлкөлөрүнүн лидерлеринин биринчи жолугушуусуна катышат. Бул тууралуу президентинин администрациясынын тышкы саясат бөлүмүнүн башчысы Муратбек Азымбакиев билдирди.
«Борбор Азия жана Европа Биримдиги өлкөлөрүнүн лидерлери саясат, соода, транспорт, экология, коопсуздук чөйрөсүндөгү жана башка эл аралык айдыңдын күн тартибинде турган актуалдуу темалар боюнча кызматташуу маселелерин талкуулашат.
Мындан тышкары, Садыр Жапаров жогорку деңгээлдеги бир катар эки тараптуу жолугушууларды өткөрөт.
Иш сапарынын алкагында, ошол эле күнү кечинде Садыр Жапаров КРнын Казакстандагы Маданият күндөрүнүн ачылыш аземине катышат», — деп билдирди Муратбек Азымбакиев.
