Белгилүү журналист, тилчи жана коомдук ишмер Эсенбай Нурушев: Мамлекеттик тил тууралуу мыйзам кабыл алынганына 35 жыл толгону менен, биз эмгиче алгач орусча ойлонуп, анан ошону сөзмө-сөз кыргызчага которуп, кандайдыр бир гибрид тилде сүйлөгөнүбүздү токтотпойбуз. Анысы аз келгенсип, эми арабча түшүнүктөр менен сөздөрдү дагы тилибиз менен дилибизге кошуп, же орус эмес, же араб эмес, же таза кыргызча эмес тилге ээ болуп баратабыз.
Түзүлгөн абалды оңдоо улам татаал болууда. Тиги же бул көрүнүш туура эмес деп айта ала турган коомдук катмар дагы жоголуп бараткандай, эч ким эч кимди укпастан, ар ким өз билгенин кылгандыктан, туура эмес сүйлөп, туура эмес сүйлөгөн адатка айланып кетти жана эч бир эрежеге ээ-жаа бербегендей болуп баратат. Абалды оңдой турган уюм-түзүмдөр өздөрү эреже-ченемдерди көп тааныбайт жана эрежеси күчтүү орус маданиятына көбүрөөк ык тартууда…
