Түркияда “Финико” каржы пирамидасын уюштургандардын бири кармалды. Бул тууралуу ИИМдин басма сөз кызматы билдирди.
Маалыматка ылайык, Анталья шаарында Кыргызстандын 100дөн ашуун жараны уюмдун ишмердигинен 1.4 млн.доллар зыян тарткан.
“2022-жылдын ноябрында эл аралык издөө жарыяланган 43 жаштагы С.А. аттуу жаран кармалды. Аталган шектүү өзгөчө ири өлчөмдөгү алдамчылык, кылмыш коомчулугун түзүү жана ага катышкандыгы үчүн изделип жаткан.
Буга чейин ИИМдин Интерполу Грузия жана Россия Федерациясынын Интерполу менен биргеликте кылмыштарга катышкандыгы үчүн Кыргыз Республикасынын Э.М. , А.Ч. жана чет мамлекеттин жараны Д.К. шектүү өз мамлекетинин аймагында жасалган ушундай эле кылмыштарды жасагандыгы үчүн эркиндигинен ажыратуу жайларында кармалып турат” – деп айтылат маалыматта.
“Финико” компаниясынын курамына Кыргыз Республикасынын жарандары Э.М., А. Ч., С.А., Р.С., Л.Н., К.М. аттуу жарандар кирген, алар кылмыштуу топтун аймактык жетекчилери болуп дайындалган. Алар 2019-2021-жылдары уруксат берүүчү документтери жок Бишкекте 17 кеңсе жайын мыйзамсыз ачышкан.
Өлкө аймагында ишмердигин жүргүзүп, жалпы суммасы 1 283 414 АКШ долларын жана 5 764 980 сомду түзгөн өзгөчө ири өлчөмдөгү акча каражаттарын ээлеп алышкан.
