Жогорку Кеңештин 5 жолку депутаты Исхак Масалиев: 2002-жылдын 17-18-март күндөрү Аксы районунда болгон окуя – Кыргызстандын эгемендик учурундагы бийлик тарабынан элге каршы курал колдонгон биринчи аракет болгон. Азимбек Бекназаровдун соту боюнча өкүм чыгаар алдында сотко барабыз деп, Кербен шаарына бараткан элди өткөрбөгүлө деп өлкөнүн жогорку бийлиги жергиликтүү бийликке айтканы менен, ок чыгаргыла деген буйрук берилген эмес.
Ошондуктан, курал колдонгон жергиликтүү милиция, аким жана прокурорлор – өйдө жактын тапшырмасын аткарган, бирок кол коюлган так буйрук болбогондуктан, алар кийин жазага тартылган эмес, айрымдары болсо кызматынан көтөрүлгөн. Бул 2 күндөгү окуяларга чейин дагы, андан кийин да эл тарабынан көптөгөн каршылык аракеттери болгон жана ошонун уландысы менен жыйынтыгы катары 3 жылдан кийин президент Аскар Акаев кызматынан кеткен…
