Өлкөдө жыл башынан бери 5437 жол кырсыгы катталып, былтыркыдан 29,2% көп. Бул тууралуу Ички иштер министрлигинин алдындагы Жол кыймылынын коопсуздугун камсыздоо башкармалыгынын жетекчиси Азамат Исраилов билдирди.
«Көпчүлүк жолдордун параметри кыймылдын көптүгүнө жана тездигине туура келбейт. Көп учурда мунун арты адам фактору менен коштолгон кайгылуу окуя менен аяктайт», — деди Азамат Исраилов.
Ошондой эле ал жол кырсыктарынын көбөйүүсүн өлкөдө автоунаалардын саны өскөнү жана жолдордун ага ылайык келбегени себеп экенин баса белгиледи.
Эскерте кетсек, жол кырсыгынан набыт болгондордун саны былтыркыдан 15% көп. Былтыркы тогуз айда бул себептен 509 адам көз жумса, быйыл 587ге жетти. Тогуз ай ичинде автокырсыктан 8298 адам жабыркаган.
