Бишкектеги көчөлөрдүн биринде аялын сабаган жаран кармалып, ага карата кылмыш иши козголду. Бул тууралуу Биринчи Май РИИБинин маалымат кызматынан билдиришти.
Маалыматка ылайык, кечээ, 11-апрелде социалдык тармактарда Бишкекте кызды сабап жаткан видео тараган. Аталган жаран милиция кызматкерлери тарабынан кармалган.
«11-апрель күнү саат болжол менен 19:00 чамасында 102 кызматына Кустанайский жана Дэн Сяопин көчөлөрүнүн кесилишинде үй-бүлөлүк жаңжал болуп жатат деген маалымат келип түшкөн. Айтылган дарекке милиция кызматкерлери барышып, маалыматты тактаганда 1992-жылы туулган Ш.Ж. аттуу жаран өзүнүн 1987-жылы туулган Ю.Н. аттуу аялын сабагандыгы белгилүү болгон. Аталган жаран Биринчи Май райондук ички иштер башкармалыгына жеткирилген. Бул факты Кылмыштардын жана жоруктардын бирдиктүү реестрине 266-берене «бейбаштык» менен катталып, сотко чейинки өндүрүшкө алынган. Бардык тийиштүү экспертизалар дайындалды. Учурда тергөө иштери уланууда», — деп билдиришти Биринчи Май РИИБинен.
