Президенттин Ош облусундагы ыйгарым укуктуу өкүлүнүн орун басары Эрнист Толтоев көк бөрү оюнунан кийин болгон окуя үчүн кыргыз элинен кечирим сурады. Бул тууралуу өкүлчүлүктүн басма сөз кызматы видео менен бөлүштү.
Толтоев көк бөрү боюнча мелдешти көрүүгө 40 миңге жакын күйөрман келгенин белгилеп кетти.
«Негизинен көк бөрүчүлөр арасында эч кандай пикир келишпестик болгон жок. Айрым күйөрмандардын тентектиги болуп калды. Бул үчүн кыргыз элимден кечирим сурайм. Ал эми, Ынтымак» менен «Достук» командасы үзөңгүлөш, бири чемпион болсо, бири вице-чемпион болуп келген. Эки команданын оюнчулары бир туугандай болуп жүргөнүн көрдүк», — деди ал.
Андан соң, Ош тургундарынын атынан «Ынтымак» командасына тулпар тартуулап, команданын капитаны Жолдошбек Орозбаевге мингизди.
