Кыргыз улуттук “Кабар” маалымат агенттиги Президент Садыр Жапаровдун жеке колдоосу менен 2025-жылы чыгарылган Chevrolet Cobalt үлгүсүндөгү эки жаңы кызматтык унаалуу болду.
Кызматтык унааларды агенттиктин жамаатына президенттин басма сөз катчысы Аскат Алагөзов тапшырды.
Кыргыз улуттук “Кабар” агенттиги мамлекеттик саясатты коомчулукка жеткирүүдө маанилүү ролду ойнойт, — деген пикирин билдирди Президенттин басма сөз катчысы.
“Расмий маалыматтар, коңшу мамлекеттер менен болгон дипломатиялык алакалар же башка өлкөлөрдө болуп жаткан окуялар боюнча маалымат алууда биринчи кезекте расмий булактарга, анын ичинде мамлекеттик маалымат агенттиктерине таянышат. Бул жагынан алганда, «Кабар» агенттиги мамлекеттин позициясын коомчулукка так жеткирүүдө негизги милдетти аткарып келет”, – деди Алагөзов.
Өз кезегинде “Кабар” маалымат агенттигинин директору Медербек Шерметалиев кызматтык унаалар үчүн ыраазычылыгын билдирип, бул колдоо агенттиктин сапаттуу иш алып барышына, маалыматты коомчулукка ыкчам жана туура жеткирүүгө шарт түзөрүн белгиледи.
