Баткен облусунун Кадамжай районундагы Айрыбаз айыл аймагынын жер тилкелерин мыйзамсыз берүү фактысы боюнча козголгон кылмыш ишинин тергөөсү аяктады.
УКМКдан билдиришкендей, аталган айыл аймакта токтомдун негизинде КРнын 581 жаранына 95 га жер тилкеси бөлүнүп берилген. Ошол эле учурда, жашабаган адамдарга жер тилкесин берүү фактылары, айрым райондук деңгээлдеги кызмат адамдарынын туугандарына берилген фактылар тергөөнүн жүрүшүндө аныкталып документтештирилди.
Ишти иликтөөнүн жүрүшүндө Айрыбаз айыл аймагынын башчысы, анын орун басары жана жер адисине Кылмыш-жаза кодексинин 337-беренесинде каралган кылмышты жасаган деген айып тагылып, ээлеген кызматтарынан четтетилишкен. Учурда кылмыш ишин Кадамжай райондук соту карап жатат.
