Чүй облусунун Кара-Балта шаарында мамлекеттик ипотеканын алкагында жаңы турак-жай комплекси курулат. Бул тууралуу президенттин Иш башкармалыгынын башчысы Каныбек Туманбаев капсула коюу аземинде билдирди.
Анын айтымында, президенттин тапшырмасы менен Кара-Балта шаарында 15 кабаттуу 60 блоктон турган турак-жай комплекси курулат. Комплекс жалпы жонунан 4 420 батирден турат.
Тургундар үчүн мындан тышкары, комплекстин аймагында 80 коммерциялык жай каралган. Ага катар жергиликтүү тургундар үчүн бардык шарттар түзүлүп, заманбап инфраструктура камсыздалат.
Маселен:
- 750 орундуу эки мектеп (2 нөөмөттүү);
- 280 орундуу эки бала бакча;
- Балдар аянтчалары;
- Эс алуу зоналары;
- 2 064 орундуу унаа токтотуучу жай;
- Өзүнүн жеке заманбап жылуулук борбору (котельная) болот.
«Бул долбоор шаар тургундары үчүн алда канча ыңгайлуу. Ар бир курулуш өлкөнүн өнүгүшүнө чоң салым кошот», — деди ал.
