Панфилов районунда Казакстандын жараны ири өлчөмдөгү баңгизатты мыйзамсыз жүгүртүүгө шектелип кармалды. Бул тууралуу Ички иштер министрлигинен билдиришти.
Милицияга Панфилов районунда белгисиз азият улутундагы жарандар көп убакыттан бери баңгизатты мыйзамсыз жүгүртүү менен алектенип жүргөнү тууралуу маалымат түшкөн.
Бул факты боюнча кылмыш ишин козголуп, жүргүзүлгөн ыкчам-иликтөө иш-чараларанын жүрүшүндө Бишкек — Чалдовар унаа жолунан 1975-жылы туулган К.Т. аттуу казак жараны кармалган. Тинтүү жүргүзүү учурунда жанынан жалпы салмагы 3 670 граммды түзгөн баңгизат алынган.
Криминалистикалык кызматы алынган заттын 1865,58 граммы апийим жана 1432,65 граммы кара куурай чайыры (гашиш) экенин аныктаган.
Учурда кармалган жаран КР мыйзамдарына ылайык, Панфилов РИИБдин убактылуу кармоочу жайына киргизилип, тергөө иштери уланууда.
