2009-жылдан бери каттоодо турган уюшкан кылмыштуу топтун мүчөсү, кримчөйрөдө Кеша каймана аты менен таанылган жаран кармалды. Бул тууралуу УКМК кабарлады.
Ал мамлекеттик чек араны системалуу түрдө мыйзамсыз кесип өтүүгө айыпталууда. Шектүү Камчы Көлбаевдин тарапташы болгону, ага чейин Алманбет Анапияевдин кылмыштуу тобунун мүчөсү болгону айтылат. Р.К.Р. 2016-жылы тыюу салынган баңгизат саткандыгы үчүн 12 жылга кесилген. Жазасынын жарымын өтөгөндөн кийин шарттуу түрдө мөөнөтүнөн мурда бошотуу тууралуу арыз берип, Токтогул райондук соту аны канааттандырган.
2022-жылдын 18-октябрынан 2025-жылдын 13-мартына чейин пробациялык көзөмөлдө болгон. 2024-жылдын декабрында ал көзөмөл шарттарын одоно бузуп, кыргыз-казак мамлекеттик чек арасынан «брод» деп аталган тилке аркылуу ары-бери өтүп жүргөн.
ИИМдин Уюшкан кылмыштуулукка каршы күрөшүү башкармалыгы менен чогуу жүргүзүлгөн операциянын алкагында шектүү кармалып, УКМКнын тергөө абагына киргизилди.
