Ош облусундагы Ноокат районунун Көк-Жар аймактык милиция бөлүмүнүн башчысы Тимур Абдисатар уулу 2025-жылдын 20-январына чейин Бишкектеги №1 тергөө абагына камакка алынды.
Мындай токтомду Бишкектин Биринчи май райондук соту 27-ноябрда чыгарганы маалым болду. Милиция кызматкерин камакка алуу өтүнүчүн сотко Ички иштер министрлигинин Тергөө кызматынын өзгөчө маанилүү иштерди тергөө боюнча тергөөчүсү берген.
Ага Кылмыш-жаза кодексинин “Пара алуу” беренеси менен айып коюлууда. 26-ноябрда Абдисатар уулу ИИМге өзү барып, тергөөдөн качпаганын, издөөгө алынганын билбей жүргөнүн айткан. Ошол эле күнү кечинде Фейсбуктагы баракчасына кармалгандан кийин кыйноого кабылганы тууралуу билдирүү жарыялаган.
