Чүй облустук соту Селекцияда бычакталган аялдын мурдагы күйөөсүн «зордуктоо» беренеси менен мурда козголгон иш боюнча сегиз жылга эркинен ажыратты. Бул тууралуу 7-каналга Жогорку Соттун басма сөз кызматы билдирди.
Маалыматка караганда, иш боюнча апелляциялык арыз 27-сентябрда каралган. Сокулук райондук сотунун ушул жылдын 17-апрелиндеги чечими өзгөртүлүп, шектүүгө карата пробациялык мөөнөт алынды.
Эске салсак, 20-сентябрда Селекция айылында 36 жаштагы аял кулак-мурду кесилген, сабалган абалда ооруканага түшкөн. Кылмышка шектүү катары мурдагы күйөөсү, 39 жаштагы жаран кармалган. Келинге алгач сегиз сааттык операция жасалган.
Аталган факты боюнча Кылмыш-жаза кодексинин 130-беренесинин («Денеге оор залал келтирүү») негизинде кылмыш иши козголгон, тергөө уланууда.
