КР Саламаттыкты сактоо министрлигине караштуу Республикалык психиатрия жана наркология борборундагы коррупциялык схема токтотулду. Бул тууралуу УКМКнын басма сөз кызматы билдирет.
Маалыматка ылайык, аталган борбордун кызматкерлери оор жана өзгөчө оор кылмыштар боюнча айыпталган адамдарга «акыл-эси жайында эмес» деген корутунду чыгарып, кылмыш жоопкерчилигинен качууга мүмкүндүк беришкен.
2025-жылдын ортосунда Республикалык психиатрия жана наркология борборунун алты эксперт-дарыгери Кылмыш-жаза кодексинин 282-беренеси («Баңгизаттарды, психотроптук заттарды жана алардын аналогдорун сатуу максатында мыйзамсыз даярдоо») боюнча айыпталган М.А.А. аттуу кыргыз жаранынын туугандарынан 1,5 миллион сом алып, соттолуучуга карата эки жолу «акыл-эси жайында эмес» деген корутунду чыгарып беришкен.
2025-жылдын 10-декабрында аталган борбордун эксперт-дарыгери: 1950-жылы туулган А.Дж., 1966-жылы туулган Ш.Н.Т., 1969-жылы туулган Ч.Ю.В., 1971-жылы туулган К.Ж.Р., 1972-жылы туулган С.Л.Л., 1997-жылы туулган З.М.Д. кармалып, КР УКМКнын тергөө абагына киргизилди. Алар жогоруда айтылган 2 жолку соттук-психиатриялык экспертизаны жүргүзүшкөн.
Учурда аталган коррупциялык схемага тиешеси бар башка кызмат адамдарын аныктоо боюнча иликтөө уланууда.
