Тышкы иштер министрлигинин Консулдук департаментинин директору Сейтек Жумакадыр уулу АКШнын Кыргызстандагы элчилигинин консулдук бөлүмүнүн жетекчиси Кейт Коллинз менен жолугушту. Бул тууралуу Тышкы иштер министрлигинен кабарлашты.
Ведомствонун маалыматына ылайык, анда тараптар консулдук тармактагы эки тараптуу кызматташуунун актуалдуу маселелерин кеңири талкуулап, өзгөчө АКШнын визалык саясатындагы акыркы өзгөрүүлөргө көңүл бурушту.
Кыргыз тарап визалык маселелер боюнча өз ара кабыл алынуучу ыкмаларды иштеп чыгуу максатында конструктивдүү пикир алмашууну улантуунун маанилүүлүгүн белгиледи.
Кейт Коллинз кыргыз жарандары тарабынан визалык режимди сактоого байланышкан айрым аспектилерди айтып, мындан аркы талкууга жана өз ара аракеттенүүгө кызыкдар экенин билдирди.
Жолугушуунун жыйынтыгында тараптар консулдук мамилелердин бардык багыттары боюнча кызматташууну мындан ары да бекемдөөгө даяр экендиктерин тастыкташты.
