Кыргызстандын Өзбекстандагы Соода өкүлчүлүгү өзбекстандык «MILLENIUM LIGHT» ЖЧКсынын жетекчилиги менен жолугушуп, Кыргызстанда ширеңке өндүрүү боюнча биргелешкен ишкана түзүү мүмкүнчүлүгүн талкуулады. Бул тууралуу Экономика министрлиги билдирди.
Жолугушууда өндүрүштү жергиликтештирүү, ошондой эле ширеңке продукциясын Кыргызстанга түз жеткирүүнүн логистикалык механизмдери каралды.
Соода өкүлү Бакай Акбаралиевдин айтымында, долбоор логистикалык чыгымдарды азайтып, ички рынокту сапаттуу продукция менен камсыздоого, инвестиция тартууга жана жаңы жумуш орундарын түзүүгө өбөлгө болот.
Өзбек тарап да Кыргызстандын рыногуна чыгууга кызыкдар экенин билдирип, биргелешкен долбоорду ишке ашырууга даяр экенин белгиледи.
