Москвада массалык баш аламандыктарды уюштурууга жана бийликти күч менен басып алууга чакырык жасаган кыргыз жараны кармалды. Бул тууралуу УКМКдан билдиришти.
Кылмыш-жаза кодексинин 327-беренеси (“Бийликти күч менен басып алууга ачык чакырыктар”) боюнча козголгон кылмыш ишинин алкагында көрүлгөн ыкчам-иликтөө иш-чараларынын жүрүшүндө, өлкөдөн тышкары жүрүп тенденциялуу жана чагымчыл маалыматтарды, анын ичинде массалык баш аламандыкка жана андан кийин бийликти күч менен кулатууга, басып алууга чакырыктарды жарыялаган фейсбуктун активдүү колдонуучусу, 1986-жылы туулган Кыргызстандык жаран “К.Н.К.” мамлекеттик жана мамлекеттер аралык издөөгө алынган.
Ыкчам-издөө иш-чараларынын жүрүшүндө аталган жаран Россиянын аймагынан кармалып, Кыргызстандын аймагына алып келинди.
Соттун санкциясынын негизинде ал 20-ноябрга чейин УКМКнын Жалал-Абад облусу боюнча башкы башкармалыгынын тергөө абагына киргизилди.
Учурда тергөө уланууда.
