Суу ресурстары, айыл чарба жана кайра иштетүү өнөр жайы министрлиги Кыргызстан, Казакстан жана Россиядагы негизги азык-түлүк товарларынын бааларына салыштырма мониторинг жүргүздү.
Анын жыйынтыгында Кыргызстанда пияз 6,9%га, картошка 4,6%га арзандаганы белгилүү болду. Ошол эле учурда сабиз, сүт жана кой этинин баасы бир аз өскөн.
Казакстанда болсо картошка 11,9%га, баш пияз 7,1%га кымбаттаган. Ал эми Россияда азык-түлүк бааларында олуттуу өзгөрүү катталган эмес.
Министрлик белгилегендей, мониторинг өлкөлөр ортосундагы негизги азык-түлүк товарларынын бааларынын өзгөрүү динамикасын салыштыруу максатында жүргүзүлдү.
