Кыргызстанда коронавирустун үчүнчү толкуну башталганы байкалып жатат. Бул тууралуу саламаттык сактоо министринин орун басары Жалалидин Рахматуллаев брифинг учурунда билдирди.
Маалыматка ылайык, биринчи толкун 2020-жылдын июнь-июль айына туш келип, бир суткада 1600 адам илдет жуктурган учур болгон. Экинчи толкун октябрь-ноябрда болуп, бир сутка ичинде жуктургандардын саны 600гө жеткен.
«Учурда үчүнчү толкун байкалып жатат. Жети күндүн ичинде коронавирус жуктургандардын саны миңден ашты. Өткөн жылы Кыргызстанда «британиялык» штамм жок болчу. Үстүбүздөгү жылдын март айында Новосибирскидеги лабораторияга үлгүлөрдү жибергенбиз. Натыйжада анын 44 пайызынан «британиялык», 39 пайызынан «россиялык» жана «түштүк африкалык», «индиялык» штаммдар табылган», — деди Рахматуллаев.
Эскерте кетсек, министрдин орун басары санитардык нормалар жакшы сакталбаса, статистика өсө турганын кошумчалады.
