Соода-өнөр жай палатасында Казакстандын Кооперативдер жана башка экономикалык коомчулук формаларынын улуттук ассоциациясы (NACOFEC) Кытай рыногуна чыгуу мүмкүнчүлүгүн берген программасын сунуштады.
Ведомстводон маалымдашкандай, экспорттук коридорлорду ийгиликтүү өнүктүрүп жаткан уюм Бишкекте биринчи жолу өзүнүн мүмкүнчүлүктөрүн көрсөтүп, кыргыз ишкерлерине Кытайдын чекене соода тармагы болгон China Co-opко түз кирүү мүмкүнчүлүгүн берди.
Кыргызстандык органикалык өндүрүүчүлөр өз продукцияларын Кытайдагы 341 миңден ашык соода түйүндөрүн бириктирген China Co-op тармагында сатуу мүмкүнчүлүгүнө ээ болушат.
Кыргызстандын Соода-өнөр жай палатасынын вице-президенти Авазбек Керимбаев Кытай рыногу экономиканы көтөрөрүн айтып, казакстандык өнөктөштөр тажрыйба бөлүшүүгө жана лабораториялык инфраструктураны өнүктүрүүгө көмөктөшөрүн белгиледи.
NACOFECтин президенти Казыбек Шайх өндүрүүчүлөрдү бириктирүү жана Кытайга продукция сатуу үчүн «жашыл коридор» түзүү кыргызстандык таза азыктарды жайылтууга жол ачарын белгиледи
Иш-чара NACOFEC менен Соода-өнөр жай палатасынын ортосундагы кызматташуу жөнүндө меморандумга кол коюу менен аяктады.
