«Кыргызтелеком» Бишкек шаардык телефон тармагын жана Чүй облустук филиалын жоюуда. Кыргыз фонд биржасы билдиргендей, мындай чечим компания акционерлеринин 17-апрелде өткөн жалпы чогулушунда кабыл алынган.
Мындан тышкары акционерлер «Кыргызтелекомдун» уставынын жаңы редакциясын бекитишти. «Кыргызтелеком» бул маалыматты өз сайтында да тастыктап, негизги административдик имараты сатылганына байланыштуу компаниянын юридикалык дареги өзгөргөндүгүн маалымдады. Эми «Кыргызтелекомдун» борбордук аппараты мурдагы Бишкек шаардык телефон тармагынын имаратында жайгашат: Ахунбаев көч., 123.
«Кыргызтелекомдун» башкы имаратын «Айыл банк» сатып алары 2025-жылдын январь айында белгилүү болгон.
