Кыргыз-кытай чек арасынан өткөн жүктүн көлөмүн көбөйтүү боюнча сүйлөшүүлөрдө коңшу өлкө Кыргызстандын жарандарынын 70 пайызы коронавируска каршы вакцина алсын деген маселени коюп жатат. Бул тууралуу Жогорку Кеңеште Мамлекеттик бажы кызматынын төрагасынын орун басары Кыялбек Мукашев билдирди.
Бүгүнкү күндө кыргыз-кытай чек ара аркылуу суткасына 30-35 автоунаа өтүп жатат.
Эске салсак, учурда өлкөдө коронавирус күчөп жаткандыктан кыргызстандыктарды аталган илдеттен сактоо максатында жапырт эмдөө аракеттери башталды. Кечээ, 11-июль Кытайдан 1 млн 250 миң доза вакцина алынып келинген. Анын 1 млн 100 миң дозасы республиклык бюджеттен сатып алынды. Калган 150 миң дозаны Кытай өлкөсү жардам иретинде берген.