Лейлекте аткезчилик жолу менен дары-дармек ташыган коңшу мамлекеттин жараны кармалды. Бул тууралуу Баткен облустук милициясынан билдиришти.
Маалыматка ылайык, тажикстандын 51 жаштагы жараны менен Лейлек районунун 37 жаштагы тургуну өз ара акча табуу максатында алдын ала сүйлөшүп алышып, эч кандай документи жок мыйзамсыз дары-дармектерди Тажикстандан Кыргызстанга киргизишкен.
Тажикстандын жараны Лейлек районунун Жаңы-Жер айыл аймагынын Борбордук айылында Э.М. аттуунун автоунаасына түн ичинде жүктөп жаткан жеринен кармалган. Ага карата кылмыш иши козголуп, убактылуу кармоочу жайына киргизилди.
Жогорудагы фактылар боюнча топтолгон материал караштуулугу боюнча УКМКга жөнөтүлдү.
