Бишкек шаарынын Ленин райондук сотунун судьясы пара алуу фактысы менен кармалды. Бул тууралуу УКМК билдирет.

Ал ортомчу болгон М.С.А. аттуу адвокат аркылуу каралып жаткан жарандык иш боюнча оң чечим кабыл алгандыгы үчүн пара түрүндө 22000 АКШ доллары суммасында акча каражатын алган.

Мындан улам, Башкы прокурору тарабынан Ленин райондук сотунун судьясы жана адвокатына карата «Жооптуу кызмат адамы тарабынан ири өлчөмдө пара алуу» беренесинде каралган негиздер боюнча кылмыш иши козголгон. Иликтөө иш-чараларынын натыйжасында коррупциялык схеманын бардык катышуучулары күнөөсүн мойнуна алышкан.

13-февралда Судьялар кеңешинин, ошондой эле Биринчи Май райондук соту тарабынан Ленин райондук сотунун судьясы А.М.А.ны УКМКнын тергөө абагына камакка алуу чечими чыгарылган.

Учурда жогорудагы фактыларды документтештирүүгө, ошондой эле судьянын жана башка адамдардын ушундай эле кылмыш иштерин аныктоого багытталган тиешелүү ыкчам – тергөө иш-чараларын жүргүзүү улантылууда.