Ливияда селден курман болгондордун саны 18-20 миңге жетиши мүмкүн. Бул тууралуу Дерна шаарынын мэри Абдулменам ал Гайти маалымдады.
Калаа башчысы мындай божомолду сел жууп кеткен жерлердин масштабына салыштырып айткан. Ал эми AP агенттиги Ливия өкмөтүнө таянуу менен 5500 адамдын өлүмү тастыкталганын, дагы 9000ге жакын киши дайынсыз экенин билдирген.
7-сентябрда башталган нөшөр, ага кошумча 10-сентябрга караган түнү Жер Ортолук деңизи тараптан каптаган «Дэниел» бороонунан Ливиянын чыгышы өзгөчө жабыркады. Суунун агымы эки дамбаны бузуп кеткен. Табият кырсыгы 125 миң калкы бар Дерна шаарынын төрттөн бир бөлүгүн жарактан чыгарды.
Белгилей кетсек, бул өлкөгө Египет, Алжир, Палестина, Түркия, Кувейт, Катар, Италия жана АКШ материалдык-каржылык жардам көрсөтүүдө.
