Өлкөдө сугат сууга тийиштүү абал оор. Мындан улам, Министрлер кабинетинин төрагасы Улукбек Марипов кечээ, Суу ресурстары мамлекеттик агенттигинин директору Алмаз Сокеевге сөгүш жарыялады.
Марипов, Кемин районундагы сугат сууга байланыштуу абал менен жеринде таанышкан.
«Фермерлер сугат суунун жетишсиздигине байланыштуу кооптонуусун билдирүүдө. Мен аларды түшүнүп турам. Сугат суунун таңкыстыгы түшүмдүн жыйым-теримине кедергисин тийгизет. Мындан чыгуунун жолдорун табуу керек. Суунун аздыгына шылтоолоп отура бербеш керек. Биз жакшы түшүм алуу үчүн дыйкандарды суунун тийиштүү көлөмү менен камсыздообуз керек. Бул азык-түлүк коопсуздугуна байланыштуу маселе», — деди Улукбек Марипов.
Сугат тармагындагы негизги көйгөй – өткөрүү жөндөмдүүлүгү бүгүнкү талаптарга туура келбеген эски советтик сугат каналдары. Мындан тышкары, суунун жетишсиздиги каналдардын айрым борпоң топурактуу тилкелериндеги жогорку фильтрациядан улам келип чыгууда.
Министрлер Кабинетинин Төрагасы долбоордук сунуштарды ыкчам иштеп чыгуу максатында ирригациялык тармактарды өркүндөтүү боюнча кыска мөөнөттө сунуштарды киргизүүнү тапшырды.
