Борбордук шайлоо комиссиясы Жогорку Кеңештин депутаттарын мөөнөтүнөн мурда шайлоого даярдануу жана өткөрүү боюнча негизги уюштуруучулук-практикалык иш-чаралардын календардык планын кабыл алды.
Ведомствонун маалыматына караганда, мөөнөтүнөн мурда шайлоо өткөрүлүп жаткандыгына байланыштуу бардык шайлоо аракеттеринин мөөнөттөрү үчтөн бирге кыскартылды.
Календардык планга ылайык:
- шайлоо округдарынын схемаларын жана чек араларын түзүү жана бекитүү – шайлоо күнү дайындалгандан кийин 5 календардык күндөн кечиктирбестен;
- округдук шайлоо комиссияларын түзүү – шайлоо округдары түзүлгөндөн кийин;
- Кыргызстандын чегинен тышкаркы шайлоо тилкелерин түзүү – ТИМдин сунушу боюнча.
Шайлоочулардын тизмеси менен иштөө:
- УШКларда шайлоочулардын алдын ала тизмесин тааныштыруу үчүн илүү – 14-октябрга чейин;
- шайлоочулардын таанышып чыгуусу үчүн УШКларда шайлоочулардын контролдук тизмесин илүү – 10-ноябрга чейин;
- шайлоочулардын арыздарын (шайлоочу жөнүндө ката же так эместик аныкталган учурда) тактоо үчүн кабыл алуу – 8-октябрдан 14-ноябрга чейин;
- УШКларда шайлоочулардын биротоло тизмелеринин экинчи нускасын илүү – 25-ноябрга чейин.
Талапкерлерди көрсөтүү жана каттоо:
- Шайлоого катышууну каалаган саясий партиялардын шайлоого катышары тууралуу БШКга жазуу жүзүндө билдирме жиберүүлөрү – шайлоо дайындалгандан кийин 3 календардык күндүн ичинде;
- көп мандаттуу шайлоо округдары боюнча Жогорку Кеңештин депутаттыгына талапкерлерди көрсөтүү – 30-октябрга чейин (кошо алганда);
- талапкерлерди каттоо үчүн тиешелүү документтерди тапшыруу – 2-ноябрга саат 18:00гө чейин;
- Жогорку Кеңештин депутаттыгына талапкерлерди каттоо – 10-ноябрга чейин.
Шайлоо алдындагы үгүт иштери:
• Шайлоо алдындагы үгүт иштерин жүргүзүү – 10-ноябрдан 29-ноябрь саат 08:00гө чейин.
Добуш берүүнү өткөрүү тартиби:
- добуш берүүчү жайдан тышкары жерде добуш берүү мүмкүнчүлүгү жөнүндө шайлоочулардан арыздарды кабыл алуу – 28-ноябрга чейин;
- добуш берүүнү өткөрүү – 30-ноябрга саат 08:00ден 20:00гө чейин;
- ЖК депутаттарын шайлоонун натыйжаларын аныктоо – 14-декабрга чейин.
Белгилей кетсек, Жогорку Кеңештин депутаттарын мөөнөтүнөн мурда шайлоо 30-ноябрга дайындалган.
