Соцтармактар аркылуу массалык баш аламандыкка чакырган, мамлекеттер аралык издөөдө жүргөн Кыргызстандын жараны кармалды. Бул тууралуу ИИМден билдирди.

Интернет-ресурстарга мониторинг жүргүзүү учурунда белгилүү бир соцтармактын колдонуучусу коомдук-саясий кырдаалды курчутууга багытталган видеоматериалдарды таратып жатканы аныкталган. Анын негизинде тиешелүү экспертизалар дайындалып, жыйынтыгында бул материалдарда массалык баш аламандыкка, коомдук тартипти жана коомдук коопсуздукту бузуучу чакырыктар камтылганы аныкталган.

Кылмыш иши козголуп, 2023-жылдын декабрь айында 1980-жылы туулган Б.К. аттуу жаран, чет өлкөдө жашынып жүрүп, мамлекеттер аралык издөөгө алынган. Ал 2020-жылдын февралында чет өлкөгө чыгып, Россиянын аймагында жүргөн. Ошондой эле алимент төлөөдөн кыянаттык менен качкандыгы үчүн Таш-Көмүр шаардык ички иштер бөлүмү тарабынан издөөдө жүргөндүгү тууралуу да далилдер бар.

Аталган жарандын жүргөн жери аныкталып, ал Москва облусунун аймагында жашырынып жүргөн. Учурда Бишкек шаарына жеткирилип, тергөө амалдары жүргүзүлүүдө.