Ысык-Ата РИИБдин убактылуу кармоочу жайынан качып кеткен оор кылмыштарга шектүү жаран изделүүдө. Бул тууралуу ИИМден билдиришти.

Маалыматка ылайык, 5-июнь күнү Ысык-Ата РИИБдин убактылуу кармоочу жайынан качып кеткен Балыкчы шаарынын тургуну 1994-жылы туулган Сабыров Кушубек Талантбекович изделүүдө.

Ал адам уурдоо, каракчылык, эркиндигинен мыйзамсыз ажыратуу жана адам өлтүрүү беренеси менен айыпталып, кылмыш иши соттун карамагына 30-май күнү өткөн. Камакка алынган Сабыров нөөмөт маалындагы милиционердин өмүрүнө коркунуч келтирүү менен бычакты мойнуна такап, жерге жаткырып колуна темир кишен салып, бутун матрацтын айрындысы менен байлап жана оозуна чүпүрөк салып, анын жанындагы убактылуу кармоочу жайдын кире бериш ачкычын алып, убактылуу кармоочу жайдан качып кеткен.

Окуя болгон жерди кароо учурунда, бычак, аттиш, матрацтын айрындысы, темир кишен (наручник), андан тышкары убактылуу кармоочу жайдын сыртындаагы батыш тарабынан уюлдук телефону табылып алынган.

Учурда тергөө амалдары жүргүзүлүүдө.