Аламүдүн районунда өзүнүн тааныш адамын өлтүрүүгө шектелген жаран кармалды. Бул тууралуу Чүй ОИИБден билдиришти.
Маалыматка ылайык, 15-декабрь күнү милицияга Аламүдүн районунун Лесхоз айылынын тургуну 1978-жылы туулган К.С. аттуу жарандын, бычактан жаракат алып каза болгон денеси табылгандыгы туралуу билдирүү түшкөн.
Аталган факты Аламүдүн РИИБне катталып, Кылмыш жаза кодексинин 122-беренесинде көрсөтүлгөн (адам өлтүрүү) кылмыштын курамы менен кылмыш иши козголгон.
Жүргүзүлгөн ыкчам издөө иштердин натыйжасында, кылмыш ишине шектүү катары 1986-жылы туулган Г.А. аттуу жаран кармалды. Ал жабырлануучу менен спирт ичимдиктерин ичип олтуруп, ортодо чыккан чыр-чатактан улам, бычак менен жабырлануучуну моюн тарапка сайып жиберген.
Шектүү убактылуу кармоочу жайына камакка алынып, учурда тергөө иштери улантылууда.