Кечээ, 16-августта Москвада коомдук тартипти бузгандыгы үчүн кармалган төрт кыргыз жараны 15 күнгө камакка алынды. Бул тууралуу Кыргызстандын Россиядагы элчилигинен билдиришти.
Белгилей кетсек, укук коргоочу Валентина Чупик “Царицыно” аймагында 30 кыргызстандыктын кармалышы боюнча маалымат берген. Ал эми райондук милиция бөлүмүнө КРнын алты жараны алынып келинген. Элчиликтин консулдук бөлүмүнүн кызматкери укуктук жардам көрсөтүү үчүн “Царицыно” ички иштер башкармалыгына эки ирет барган.
Алардын экөө 500 рубль өлчөмүндө административдик айып төлөп, бошотулган. Калган 4 кыргызстандык Россия Федерациясынын Администрациялык жоопкерчилик жөнүндө кодексинин «Майда бейбаштык» беренесинин негизинде 15 күнгө камакка алынган.
Такталгандай, Орто-Азиялык жаш балдар футбол аянтчасында ойноп жатышып, урушуп кетишкен. Алардын мушташып жатышкандыгы тууралуу аянтчага жакын жерде жашаган тургандар милиция кызматкерлерине кабарлашкан.