Муфтият матчество тууралуу билдирүү таратты.
- Ар бир перзент тегин билүүгө укуктуу. Баланын ким төрөгөндүгү айдан ачык. Ал эми текти атага таандык кылуу муктаждыгы өтө зарыл. Ошондуктан ислам дини баланын тегин атага таандык кылат
- Тектүүлүк адамзатты жакын туугандар менен билбестен үйлөнүп, улуттун генефондуна зыян келүүсүнөн, үй-бүлөдө майып балдардын төрөлүүсүнөн сактайт. Динибиз ушул себептен баланын атасы белгилүү болуусун жактайт
- Улуттук каада-салтыбызда жети атасын билүү деген алтын эреже бар. Бул принцип аркылуу бала өзүнүн тегин таанып билет
- Бул өз кезегинде энени басынтуу деген маселе эмес! Динибизде аялзатынын даражасы канчалык бийик экендиги айдан ачык
- Матчествого өтүү баланын психологиялык жаракат алышына, коом тарабынан басмырланышына алып келет. Мындай шойкомдуу аракеттер улут тамырына балта чаап коюшу толук мүмкүн.
Эскерте кетсек, буга чейин, өлкөдө 16 жашка толгон жаранга апасынын ысымын алууга уруксат берилгенин жарандык активист Алтын Капалова соц.тармактагы баракчасына жазып чыккан. Ал эми Конституциялык сот түшүндүрмө берип, Алтын Капалованын өтүнүчү канааттандырылбаганын айткан.
