Мухаммед пайгамбардын карикатурасынын автору, сүрөтчү Ларс Вилкс Швецияда жол кырсыгынан каза болду. Вилкс менен кошо анын коопсуздугун караган эки полиция да мүрт кеткен. Бул тууралуу РИА Новости жазды.
Авария Маркарид шаарына жакын жердеги Е4 жолунда болгон. Сүрөтчү колдонгон автомобиль жүк ташуучу унааны келип сүзүп, жыйынтыгында эки унаа тең күйүп кеткен. Жергиликтүү полиция башчысы бул атайын уюштурулган автокырсык болушу мүмкүн деген күмөндү четке какты.
«Эгер бул атайын уюштурулган кырсык болсо, анда иликтөө башка нукта жүрмөк. Бирок сүрөтчү менен кошо аны коргоп жүргөн эки полиция кызматкери да набыт болгондуктан, бул ишти атайын тергөө органына тапшырабыз», — деп билдирген.
Ларс Вилкс 2007-жылы Мухаммед пайгамбардын карикатурасын тартып, Nerikes Allehanda аттуу швед гезити жарыялаган. Бул окуядан соң Вилкске карата мусулман дүйнөсүнүн сыны күчөп, ал эл аралык коомчулуктун көңүлүн өзүнө бурган. Ошондой эле ага коркутуулар башталган соң, Вилкстин коопсуздугун эки полиция кызматкери камсыздап келген.
