Ички иштер министрлиги сертификаты жок косметикалык каражаттарды жана медициналык буюмдарды контрабандалык жол менен мыйзамсыз алып өтүүгө жана сатууга байланышкан мыйзамсыз аракеттерди токтотту.
Ведомстводон билдиришкендей, Ички иштер министрлигине сертификаты жок косметикалык каражаттар жана медициналык буюмдар мыйзамсыз сатылып жаткандыгы тууралуу маалымат келип түштү. Бул каражаттар Кыргызстандын аймагына бажы төлөмдөрүн жана салыктарды төлөбөстөн, ошондой эле Саламаттык сактоо министрлигинен тийиштүү көзөмөлдөн өтпөстөн мыйзамсыз жол менен алынып келингендиги аныкталды.
Бул факты боюнча кылмыш иши козголду.
Мындан сырткары, 29-августта Бишкектеги пластикалык хирургия клиникаларынын биринде да тинтүү жүргүзүлүп, тиешелүү сертификаттары жана колдонууга уруксаты жок косметикалык каражаттар табылды. Дарыгерлердин бирине пластикалык операциядан жабыркаган жарандардын арыздарынын негизинде кылмыш иши козголуп, 1982-жылы туулган жаран кармалды.
