Бүгүн, 18-август Нарын шаарынын мэри Самарбек Болотбеков Индиянын Кыргызстандагы элчиси Алок Амитабх Димри менен жолугушуп, эки тараптуу кызматташуунун багыттары тууралуу баарлашты. Бул тууралуу Нарын шаардык мэриясынын басма сөз кызматы билдирет.
Жолугушуу учурунда мэр С. Болотбеков Нарын шаарына инвесторлорду тартуу жана кызматташуу боюнча атайын инвест кеңеш түзүлгөндүгүн жана Индия мамлекети менен өнөктөштүктө бир катар долбоорлорду ишке ашырууну жакынкы күндөрү сунуштай тургандыгын билдирген.
Эки тараптуу сүйлөшүүнүн алкагында Нарындын аймагында терини, жүндү кайра иштетүүчү ишканаларды ачуу, Индия мамлекетине дары чөптөрду, сары майды жана балды экспорттоо талкууланып, өзгөчө аялдарды жана балдарды колдоо багытындагы иштерге көңүл буруу белгиленген.