Ноокен районунда селден улам 300 үй-бүлө эвакуацияланды. Бул тууралуу ӨКМ билдирет.
Күн мурун нөшөрлөгөн жамгырдын кесепетинен Ноокен районуна караштуу Момбеков айыл өкмөтүнүн Эски-Кочкор-Ата, Бостон айылдарында кокту-колоттордон суу топтолуп, сел жүргөн.
Селдин кесепеттерин жоюуга жалпысынан 134 кызматкер, 13 инженердик техника тартылган. Тилекке каршы, Эски-Кочкор-Ата айылынын кичинекей тургуну Э.Ж. аттуу өспүрүмдү сел алып кеткен.
Момбеков айыл аймагындагы сел каптаган Бостон айылында 2143, Эски-Кочкор-Атада 500 кожолук бар. Учурда эки айылдагы кооптуу болгон жалпы 300 турак үйдүн жашоочулары убактылуу эвакуацияланды.
Сел суулары Бишкек – Ош унаа жолун каптаган. Саат 21:10дө унаа жол тазаланып, бир тараптуу ачылды.
