Ноокенде айылдашынын огунан өспүрүм каза болгонун Жалал-Абад облустук милициясынан билдиришти.
25-августтан 26-августка караган түнү саат 00:30 чамаларында Ноокен районунун Шайдан айыл аймагынын 42 жаштагы С.Б. аттуу тургуну почтанын жанында топтолуп отурган балдар тарапка өзүнүн мергенчилик куралынан бир ирет ок чыгарган. Ок аталган айыл аймактын 15 жаштагы тургунунун баш тарабына тийип, өспүрүм алган жараатынан улам ооруканада өзүнө келбей каза болгон.
Окуя Ноокен РИИБнин кылмыштардын бирдиктүү реестрине Кылмыш-жаза кодексинин 122-беренеси (Адам өлтүрүү) менен катталып, кылмыш иши козголгон.
Окуяга шектүү катары Ноокен районунун Шайдан айыл аймагынын тургуну кармалып, 2 айлык мөөнөткө убактылуу кармоочу жайга киргизилген.
Учурда тергөө амалдары жүргүзүлүүдө.
