Курулуш, архитектура жана турак жай-коммуналдык чарба министри Нурдан Орунтаев өлкө аймагындагы бардык курулуш объектилерине карата рейддик иш-чараларды уюштуруу тапшырмасын берди. Бул тууралуу министрликтин басма сөз кызматы билдирет.
Маалыматка ылайык, Бишкек шаарынын Табалдиев көчөсү 29 дарегиндеги 4 кабаттуу медициналык борбордун курулушу текшерилип, бир катар мыйзам бузуулар аныкталган.
“Имаратты жана курулмаларды долбоорлоодо жана курууда техникалык регламенттин талаптары сакталган эмес. Ошондой эле алар менен байланышкан бир нече ченемдик-укуктук актылар бузулган. Мындан улам курулуш иштерин жүргүзгөн «Палладий Групп» ЖЧКсына карата 200 000 миң сом өлчөмүндө айып салынып, мыйзам бузууларды четтетүү боюнча жазуу түрүндө эскертүү берилди”, — деп жазылат маалыматта
Министрлик курулуш тармагында иш алып барган бардык уюмдарды жана жеке жактарды Кыргыз Республикасынын мыйзамдарына ылайык курулуш талаптарын, ченемдерин жана эрежелерин так сактоого чакырат.
