Билим берүү жана илим министрлигинин “Окуучулардын саны аз жалпы билим берүү уюмдарын оптимизациялоо жөнүндө” буйругу чыкты.

Буйрукка ылайык жалпысынан 53 жалпы билим берүү уюму кошулат, анын ичинен:

• Ош облусунда – 22;
• Нарын облусунда – 10;
• Чүй облусунда – 6;
• Баткен облусунда – 5;
• Жалал-Абад облусунда – 5;
• Талас облусунда – 2;
• Ысык-Көл облусунда – 1.

Окуучулардын саны аз жалпы билим берүү уюмдарын бириктирүү иштерин райондук жана шаардык билим берүү бөлүмдөрүнүн башчылары КР президентинин облустардагы өкүлдөрү, жергиликтүү мамлекеттик администрациялар менен биргеликте 2024-жылдын 1-ноябрына чейин аякташы зарыл.

Ал эми райондук/шаардык билим берүү бөлүмдөрүнүн башчылары оптимизация болгон мектептердин кыскарган кызматкерлерин, тейлөөчү адистерди  жумушка жайгаштыруу, жергиликтүү калк менен келип чыккан маселелер боюнча иш-чараларды жана түшүндүрүү иштерин 2024-жылдын 1-декабрына чейин жыйынтыктоосу керек.

Белгилей кетсек, буйрук КР министрлер кабинетинин төрагасы Акылбек Жапаровдун 2024-жылдын 26-февралындагы № 31-6 протоколдук тапшырмасын аткаруу жана жалпы билим берүү уюмдарында билим берүүнүн сапатын жогорулатуу, окуучулардын саны аз жалпы билим берүү уюмдарын оптималдаштыруу максатында чыкты.