Улуттук коопсуздук мамлекеттик комитети кум-шагыл казуу тармагындагы мыйзам бузууларга каршы кеңири иликтөө жүргүздү.
Текшерүүнүн жүрүшүндө Чүй облусундагы ондон ашык карьер лицензиялык талаптарды одоно бузганы, казылып алынган көлөмдү жашырганы жана мамлекетке ири зыян келтиргени аныкталды.
Ошондой эле, айрым карьерлер мамлекеттик органдарга жалган маалымат берип, салык төлөөдөн качууга аракет кылган. Жаратылыш объекттерине да зыян келтирилген учурлар болгон.
Иликтөөнүн жыйынтыгында бул карьерлердин иши токтотулуп, кайрадан мамлекеттин балансына өткөрүлдү. УКМК билдиргендей, бул аракеттер коррупциялык схемаларды жоюу, лицензия берүү тартибин көзөмөлдөө жана жаратылыш ресурстарын мыйзам чегинде пайдалануу максатын көздөйт.
