Онкологиялык оорусу барлар вакцина алса болобу? Бул тууралуу Улуттук онкология жана гематология борборунун клиникалык иш боюнча жетекчисинин орун басары Сүйүтбек Дөөлөтбеков брифинг учурунда билдирди.
Маалыматка ылайык, онкологиялык оорусу бар бейтаптарды коронавируска каршы эмдөө боюнча илимий изилдөөлөр аз, бирок коронавирус оор формада өтүп, өлүм учурлары катталып жаткандыктан, рак менен жабыркаган кишиге вакцина саюу зарыл.
«Рактан бир нече жыл мурда дарыланган жана азыркы убакытта ремиссияда болгон онкологиялык бейтаптар жеке дарыгери менен кеңешиш керек. Башкача айтканда, дарыгери уруксат берсе вакцина саюу зарыл», — деди Дөөлөтбеков.
Ал эми азыркы тапта шишикке каршы дарыланып жаткандардын иммунитети алсыз болушу мүмкүн. Адис белгилегендей, булар коронавирус жуктуруп алса, тумоо оор формада өтүшү ыктымал. Ошол эле маалда эмдөө натыйжалуу да болбой калышы мүмкүн.
Белгилей кетсек, 2020-жылы ракка кабылган 5377 бейтап каттоого алынган. Былтыр онкологиялык оору менен алышып 3 539 адам көз жумган. Азыркы тапта рак оорусу менен жабыркаган 28 586 киши каттоодо турат.