Бүгүн, 23-июнда Кыргызстандын Куралдуу Күчтөрүнүн Абадан кол салуудан коргоо базасында Коргоо министрлиги менен Россия Федерациясынын «Рособронэкспорт» АКнун ортосундагы түзүлгөн контракттын негизинде МИ-17 тик учагын өткөрүп берүү аземи болуп өттү. Бул тууралуу Коргоо министрлигинен билдиришти.
Иш-чарага коргоо министри генерал-лейтенант Б. Бекболотов, «Рособронэкспорт» АК, Казань тик учак заводунун өкүлдөрү, ошондой эле КРнын Куралдуу Күчтөрүнүн Абадан кол салуудан коргоо күчтөрүнүн командачылыгы жана өздүк курамы катышты.
Аземдин жүрүшүндө коргоо ведомствосунун башчысы генерал-лейтенант Б. Бекболотов “Көп максаттуу Ми-17 тик учагы Кыргыз Республикасынын Куралдуу Күчтөрүнүн алдында коюлган тапшырмаларды аткарууга бир нече мүмкүнчүлүгүн жогорулатат”,- деп белгилеп кетти.
Учуучу техника Кыргызстанга Ил-76 самолету менен жеткирилип, Казань тик учак заводунун өкүлдөрү тарабынан чогултулуп, учкуч-сыноочулар сыноочу учууларды өткөрүшкөн.
Белгилей кетсек, аталган техниканы сатып алуу үчүн акча каражаты республикалык бюджеттен бөлүнгөн.
