Москвадагы Михаил Щепкин атындагы театралдык институтту бүтүрүп, Ош улуттук драма театрына келген 22 жаш актерго бөлүнгөн батирлердин ачкычы тапшырылды. Бул тууралуу Ош шаардык мэриясы маалымдады.
Калаадагы 96 батирлүү көп кабаттуу үй пайдаланууга берилди. Ал турак жайдан жаш актерлордон тышкары, үч эм төрөлгөн үй-бүлөлөргө жана үйү шаардагы курулуш иштери үчүн алынгандарга да тапшырылды.
Салтанатта актерлор «50 жыл мурда болгон окуя» аталышындагы театрлаштырылган сценканы тартуулады. Эл артисттери Назира Мамбетова менен Жамила Сыдыкбаева театралдык окуу жайдын бүтүрүүчүлөрүнө батир берүү 50 жылдан кийин кайталанып жатканын айтып, мэрге ыраазылык билдирди.
Эске салсак, мэр Жеңишбек Токторбаев май айында актерлор менен жолугуп, ипотекалык негизде батир берүүнү убадалаган.
